Os voceiros do BNG de Lousame e Noia, Amador Turnes e Irati García respectivamente, tras recibir unha queixa veciñal visitaron a zona onde está situada a vella depuradora do río Tállara, en Abeixón (Lousame) para comprobar in situ como se están a producir verteduras directas ao río sen nengún tipo de depuración, causando un problema de salubridade, mal olor e contaminación que cando suba o caudal do río terá como destino a ría de Noia. Este non é máis que un de tantos puntos de vertido de augas sen depurar que finalmente recalan na ría noiesa.

Hai escasos días o director de Augas de Galiza visitou a as inmediacións do río Tállara por mor dunha actuación na zona, obviando o estado desta vertedura que se produce de xeito constante, constituíndo un foco de contaminación situado preto de varias vivendas.

Lembramos que o río Tállara ven desembocar á ría de Noia pola zona de San Lázaro, onde o humidal está nun estado lamentable que xa foi denunciado polo BNG de Noia no actual mandato con motivo do Día Internacional dos Humidais, sendo aprobada a proposta de recuperación da zona polo pleno. Mais a recuperación da zona non se pode producir se as augas que se verten non son depuradas previamente.