AS ACTUACIÓNS SUPORÍAN MÁIS DE 1.700.000€ PARA A MELLORA DA EDAR E DOS BOMBEOS MUNICIPAIS.

O BNG aposta polo desenvolvemento da rede de saneamento noiesa

Encontro coa de veciñanza de A Barquiña.
Encontro coa de veciñanza de A Barquiña.

Os nacionalistas presentaron as súas propostas de investimento para a mellora na depuración das augas residuais nun encontro coa veciñanza de A Barquiña.

O BNG aposta polo desenvolvemento da rede de saneamento noiesa

O BNG presentará, tanto no Parlamento galego como no pleno do Concello de Noia, sendas iniciativas para instar á Xunta a poñer en marcha o Plan Director de Saneamento de Noia, o cal foi redactado no pasado 2021. Os nacionalistas apostan por un investimento de 1.325.000 euros por parte do executivo galego para a mellora e actualización da Estación de Depuración de Augas Residuais.

Alén deste importante investimento, inclúense nestas iniciativas outras dúas propostas, en primeiro lugar a sinatura dun convenio entre Xunta e Concello para o mantemento da rede de saneamento e en segundo lugar a realización de un calendario de investimentos para a consecución do Plan Director.

A deputada Rosana Pérez recordou que se trata do segundo Plan Director de Saneamento de Noia, pois o primeiro, de 2008, “traduciuse en importantes investimentos que melloraron o estado da rede de tratamento de augas residuais da localidade”. Posteriormente lamentou o feito de que “a Xunta non seguise desenvolvendo aquel plan, sen facer ningún investimento no mesmo dende o 2013”. Pérez tamén lamentou “a degradación da rede de saneamento que se sinala no actual Plan Director, onde se afirma que o abandono do mantemento da infraestrutura dende 2016, xusto cando o Partido Popular entrou no goberno municipal, fixo que as cifras de xestión das augas e de proliferación de vertidos incontrolados sexan peores cada ano”.

Pola súa parte Ricardo Suárez mencionou a importancia de levar a cabo estas actuacións sobre a EDAR, pois “son a base para poder mellorar a rede de saneamento noutros puntos do municipio, xa que non ten sentido bombear augas a unha EDAR cun funcionamento deficiente”. Suárez agradeceu a insistencia do grupo parlamentario do BNG nesta cuestión, lembrando que volven a levar esta iniciativa logo de que o Partido Popular vetase a inclusión do investimento na EDAR nos orzamentos do executivo galego.

O portavoz do BNG en Noia tamén lembrou a súa aposta por destinar 388.000 euros do POS 2022 á mellora dos bombeos da área da Barquiña, unha das primeiras actuacións que se contemplan no Plan Director. Neste sentido, sinalou que “ademais da súa repercusión na calidade das augas, as carencias do saneamento tamén xeran cheiros que afectan de xeito importante á calidade de vida da veciñanza, tanto en A Barquiña como en outras moitas localizacións do municipio”.
O BNG aposta polo desenvolvemento da rede de saneamento noiesa